1Pe 2 | WSK | STEP | Se umutang ko, nina ikia munan memek suen la waru saparalko, kula kawel, se den ningo balu se munan kawel betera ko kiwem, se saki nunga ikia nunga ura mel nunga bagara ko nengemang magara, se saki nubiring ko den bala, kilek umutang suen la waru saparalko.

1 Peter 2

1 Se umutang ko, nina ikia munan memek suen la waru saparalko, kula kawel, se den ningo balu se munan kawel betera ko kiwem, se saki nunga ikia nunga ura mel nunga bagara ko nengemang magara, se saki nubiring ko den bala, kilek umutang suen la waru saparalko. 2 Ale kuriang barare amin ko la niasan iwitata, nina duruk wonong ko inang yu yawara, nedera sangukko Kaem ningarso umutang la nalko sail tagiral, ale te lagaral ale yawarakala bagaralko. 3 Mu awuk, nina Kari Biya ko munan aringiman, mu yawarakala nunguningkiri.

Kari Biya mu anananga manga gek am

4 Se Kari Biya kote tairalko. Nu manga aora, kawam te kalosan mu turan, marak tom suen biya bagoso. ^{▼▼1 Peter 2:4-8 Manga gek am ko den: Mat 16:18; Eph 2:21-22. Manga ari pateman: Mat 21:42; Rom 9:33; 1 Cor 1:23.} Kariimet ari pateman ale nubiring tuman, bare Kaem noko ikiam mu yawarakala, se nu balu beteram se bagoso. 5 Nina betela manga aora marak tom suen biya bagoso wore turantala, se kote tairal se kawam kalosan iwitata Kaem ninga bolala awurok se ko Bur ninga ningi bagurukko. Nina priest kako nunguningkiri baga se, Jesus Kristus nup te munan Kaem ko kueso mu bita tualko, tama bita tua iwitata bita tual, se ko amilmilurukko. 6 Mu awuk, Kaem ko batoga te iwita balam se aniso:

“Arigalko, ani manga bo yawarakala nunguningkiri Zion beterem.
Manga mu sokel ago kawam giokko,
se awiriya ko gomang ningi nunguning aruk mu me dolurukko.” ^{▼▼1 Peter 2:6-8 Isaiah 28:16; Psalm 118:22; Isaiah 8:14.}
7 Se nina kariimet nengemang ningi nunguning, mu nina manga mu arigisan yawarakala nunguningkiri. Bare awiriya nongomang ningi nunguning mena, mu Kaem ko batoga te mu iwita nunga balso:

“Manga bo kawam kaola kari alo memek ma balman,
mu manga borta kawam giwoso.”
8 Se aking batoga te iwita balso tala:

“Manga umutang kariimet nusuwik te atumusan ale dagulasan.”
Kariimet nuna Kaem ko den gilalong yawara nubiring tusan umutang ko nuna nusuwik manga mu te atumusan ale dagulasan. Mu Kaem maingkala balam se aniso bare te nuna butata betesan.

Ana Kaem ko kariimet bagasan

9 Bare nina mu Kaem noko kariimet ko ninga balam. Nina King Biya ko priest, ale kariimet biguwura suwanta se laili. ^{▼▼1 Peter 2:9 Ana Kaem ko kariimet biguwura suwanta laili: Exodus 19:5-6.} Kaem ninga auram ale tiromorom ningi ninga giam ale ko nikim yawara te ninga awuram, mu nina ko nup patawu se, ko dugu duap balu se bagaralko nu butata beteram. 10 Ulengkala nina Kaem ko kariimet mena, bare aitak nina noko kariimet bagasan. Ulengkala nina Kaem ko gomang ningara se ko munan buring ko bagakasan, bare aitak mu nina aringiman ko ikiman.

11 Aga singsang yawara, nina sor awar ko kariimet iwita ali imi te bagasan. Buta se ani iwita ninga manorsam, ikia memek nengemang barasa mu nibiring tualko. Ikia munan umutang mu ninga nedera ningimik maguwurokko ago kaeso. 12 Nina kariimet saki Kaem ko me ikisan mu nunga ningi yawarakala bagaralko. Se nuna kariimet memek ko ninga balmon agi, bare nuna ninga betera kaora ningo aringimon ale tom Kaem nongote tairuk mu te ko nup patawomonko. ^{▼▼1 Peter 2:10-12 Ana sor awar ko kariimet iwita: John 17:16; 18:36; Heb 11:9-10; 1 Pet 1:1. Ana nikim iwita baganakko: Mat 5:16.}

Ana kari supuling alo nuguring bowa ningi baganakko

13 Nina Kari Biya ko ikial ale ali supuling suen la nuguring karo tualko. Supuling awiriya gira bagoso umutang kuring karo tualko. 14 Se supuling noko bowa ningi mu betela nuguring karo tualko. Mu awuk, nu balam se nuna supuling ko bagasan. Nuna arikaya memek betesan mu ko koma memek nungarmonko. Aking arikaya munan ningo betesan mu nunup patawomonko. 15 Mu Kaem ko gomang iwitata aniso: nina kilek ningo la beteral, ale mu te kari ikia mena alo nunga den ngualara menawuralko. 16 Nina kilek memek ko ura dungan iwita bagaman, bare Kaem ninga bataguru tam. Buta se, nina aking kilek memek ko ura dungan ko iwita me bagaralko. Nina Kaem ko ura kari iwita bagaralko. 17 Kariimet suen la nunga ikia tal ale munan ningo la te yawarakala arungu bagaralko. Kris kariimet nunga kueralko. Kaem ko nguangaralko. Ale ali sor supuling gira bagoso mu nup patawu se bowa ningi bagaralko.

Ana Jesus ko molak karo tunakko

18 Nina ura dungan kariimet, nina nisipiling me lagurukko, bare am ninga bitua kari nunga nobowa ningi baga se, nuguring karo tualko. Bare bitua kari saki nunga munan ningo se yawarakala ninga bitarsan mu la me nuguring karo tualko. Mena. Bitua kari sang nunga munan memek mu karogotala nuguring karo tualko. 19 Mu awuk, nina memek bo me beteral se ikup yaman ningarmon se nina Kaem ko iki se ikup mu gial, mu Kaem nenenga munan mu ko amilmilurukko. ^{▼▼1 Peter 2:19-21 Nanga bita maguwumon agi mu ikup mu am ginakko: 1 Peter 3:17; 4:14; Mat 16:24.} 20 Bare nina memek beteral se ko koma ninga momon se ikup mu gial, mu Kaem nenenga munan ko amilmiluruk i? Mena. Bare nina munan ningo beteral se umutang ko ninga bita maguwumon se ikup mu gial mu, Kaem ko amilmilurukko.

21 Munan umutang nina karo tualko Kaem ninga auram. Mu awuk, Kristus nina ninga sangukko ikup yaman giam mu nu kausa ningaram, nina noko molak kaoral ale betela te beteralko. 22 “Nu memek bo me beteram, ale ko kuring kuamili te kawel bo me aratukaso.” ^{▼▼1 Peter 2:22 Isaiah 53:9. Jesus memek bo me beteram: John 8:46.} 23 Tom nuna den memek tuikasan, mu nu koma den memek me nungarukaso. Ale tom nuna nu bita maguwukasan, mu nu maingte koma memek nungarukko den bo me nunga manarukaso. Mena. Nu kota ko kumik guang lilim la Tutera Kari diram nunguningkiri Kaem kuting te beteram. 24 Nu kota ko kumik guang te nanga betera kaora memek giam ago tam kangono te kekaram, umutang te ana kilek memek suen la nabiring tunak ale diram la baganakko nu butata beteram. Noko kumik guang bita maguwuman umu te nina nungeman. ^{▼▼1 Peter 2:24-25 Jesus nanga memek giam ale kueram: Isa 53:5; John 10:11,14; 2 Cor 5:21.} Mu nina sipsip nunga lage supuman ale parasaman ngual ngual namawara iwita namangaman, bare nina peleman Sipsip Bitua Kari ninga nedera ningimik ko sinar taso mu kote taiman.

25